خیبرپختونخوا میں حالیہ بارشوں میں ہلاکتوں کی مجموعی تعداد 46 ہو گئی: پی ڈی ایم اے

خیبرپختونخوا میں حالیہ بارشوں میں ہلاکتوں کی مجموعی تعداد 46 ہو گئی: پی ڈی ایم اے

قدرتی آفات سے نمٹنے کے صوبائی ادارے پی ڈی ایم اے نے خیبرپختونخوا میں بارشوں کے باعث 12 اپریل سے اب تک ہونے والے نقصانات کی تفصیلات جاری کر دی ہیں جس کے مطابق اب تک صوبے بھر میں بارش کے باعث مختلف حادثات میں 46 افراد ہلاک اور 60 کے قریب زخمی ہو گئے ہیں۔

رپورٹ کے مطابق بارشوں کے باعث مختلف حادثات مییں ہلاک ہونے والے افراد میں 25 بچے، 12 مرد اور نو خواتین شامل ہیں جبکہ اس دوران 11 خواتین، 33 مرد اور 16 بچے زخمی ہوئے۔

If you want to earn daily 40$  click here   

یاد رہے پاکستان میں بارشوں کا حالیہ سلسلہ 12 اپریل سے 15اپریل تک جاری رہا تھا اور پھر دو روز کے وقفے کے بعد 17 اپریل سے بارش برسانے والا ایک اور نظام ملک میں داخل ہو گیا تھا جس دوران ملک کے طول و عرض میں گرج چمک اور تیز ہواؤں کے ساتھ بارشیں ہوئیں۔

پی ڈی ایم اے کے مطابق خیبر پختونخوا کے مختلف اضلاع میں دیواریں اور چھتیں گرنے سے مجموعی طور 2875 مکانات کو نقصان پہنچا جس میں 436 گھروں کو مکمل جبکہ 2439 گھروں کو جزوی نقصان پہنچا۔

تیز بارشوں کے باعث جانی و مالی حادثات ضلع خیبر، دیر اپر و لوئر،چترال اپرولوئر، سوات، باجوڑ، شانگلہ، مانسہرہ، مھمند، مالاکنڈ، کرک، ٹانک، مردان، پشاور، چارسدہ، نوشہرہ، بونیر، ہنگو، بٹگرام سمیت دیگر اضلاع میں ہوئے۔

ادارے کے مطابق وزیر اعلیٰ خیبرپختونخوا کی خصوصی ہدایت پر پی ڈی ایم نے حالیہ بارشوں میں متاثرہ اضلاع کی انتظامیہ کو مرنے والوں کے لواحقین کی مالی امداد اور امدادی سرگرمیوں کے لیے 110 ملین روپے جاری کیے جبکہ قبائلی اضلاع میں بھی امدادی سرگرمیوں کی مد میں 90 ملین روپے جاری کیے جا چکے ہیں.

پی ڈی ایم اے اور تمام متعلقہ اداروں کی جانب سے بارشوں سے متاثرہ اضلاع میں امدادی سرگرمیاں جاری ہیں.

یاد رہے کہ پی ڈی ایم اے کے مطابق بارشوں کا موجودہ سلسلہ 21 اپریل تک وقفے وقفے سے جاری رہنے کا امکان بتایا گیا ہے۔